Leioako Campuseko eta Loiuko aireportuko autobusetan segurtasun neurriak hartu ditzatela eskatu du EH Bilduk Bizkaiko Batzar Nagusietan. Raul Mendez batzarkideak egin du eskaria. Mendezek gogorarazi du gaur egun metro koadroko lau erabiltzaile sartzen direla autobusetan. Pandemia egoeran, ordea, koalizioak beharrezkotzat jo du edukiera hori gutxitzeko neurriak hartzea, «zerbitzu egokia eta segurua eskaintzeko». Datorren astean Leioako campuseko fakultate guztietako klaseak hasiko direnez, neurriak ahalik eta azkarrena ezarri behar direla gehitu du, «garraio publikoa kutsatze gune bat» bihur ez dadin.
Hori horrela, Miguel Angel Gomez Viar Garraioak eta Mugikortasun Jasangarria Sustatzeko foru diputatua batzordera deitzeko eskaria egin du Mendezek, autobus linea horien inguruan azalpenak emateari «beharrezko» baiteritzo.
