Zenbait hedabidek zabaldu dutenez, Nobelaren Norvegiako Batzarrak Bakearen Nobel sarirako izendatu du IPBES Bioaniztasunari eta Ekosistemen Zerbitzuei Buruzko Plataforma Gobernu Artekoa, «munduko bakeari eta garapenari egindako ekarpen izugarriarengatik». Plataforma horretako koordinatzaileetako bat da Unai Pascual ikertzailea.
Egia esateko ez dakit oso ondo zer pentsatu. @IPBES Nazioarteko Zientzia Erakundearen koordinatzaileetako bat izanik 2020 Bakearen Nobel Saria lortzeko hautagaia garela ohartzea ez da egunero gertatzen den zerbait.ð;Â;ŸÂ‘‡ð;Â;ŸÂ‘ÂÂŒð;Â;ŸÂ‘‡ https://t.co/dRd1O4TDAv
— Unai Pascual (@unaipasku) September 30, 2020
Plataformak ohar batean azaldu du hedabideen bidez izan dutela izendapenaren berri, akademiaren hautaketa prozesua isilpekoa delako, eta ez dutelako hautatzaileen mezurik jaso. Hilaren 9an adieraziko dute nori eman dioten 2020ko Bakearen Nobel saria.
Izendapenak berak «biodibertsitatearen gaineko ezagutzaren eta zientziaren garrantzia» aitortuko luke, IPBESen esanetan. «Esan nahi luke gure bakeak eta segurtasunak harreman zuzena duela naturak gizakioi egin dizkigun ekarpenekin. Egungo egoera ere esanguratsua da, osasun krisi globalean ere eragin zuzena baitu naturarekin dugun harremanak okerrera egin izanak», adierazi dute.
Nazio Batuen Erakundea biodibertsitateari buruzko batzar bat egiten ari da, eta datorren urtean hasiko dituzte negoziazioak 2030. urterako biodibertsitatearen eremuan hartu beharreko neurriak ezartzeko. Horren guztiaren garrantzia nabarmendu du plataformak.