EB Europako Batasunak espedientea ireki dio Erresuma Batuari, azken horrek brexit-erako akordioa betetzeari uko egin diola iritzita, eta hilabeteko epea eman dio egoera onbidera dezan. Aldeek adostasunik lortzen ez badute, espedientea EBko Justizia Auzitegira helduko litzateke, eta hark izango luke azken hitza.
Ursula Von der Leyen Europako Batzordeko presidenteak eman du batasunak Londresen kontra hartu duen neurriaren berri: «Gutunak Erresuma Batuko gobernuari gonbita egin dio bere oharrak hilabete bateko epean bidaltzera. Bien bitartean, Europako Batzordeak gogor egingo du lan ateratzeko ituna osorik ezartzeko».
EBk atzo arteko epea emana zion Boris Johnsonen gobernuari Erresuma Batuko barne merkaturako lege proiektua zuzentzeko, baina Londresek ez du halakorik egin. Aldiz Komunen Ganberak tramitera onartu zuen egitasmoa, duela bi aste, eta bidea egiten jarraitzen du parlamentuan.
Lege proiektuak brexit-erako akordioaren hainbat puntu urratuko lituzke bere horretan onartuz gero. Zalantzan jartzen ditu, batez ere, Ipar Irlandarako aurreikusitako neurriak; horien helburu nagusia zen ez itzultzea Irlandarekiko muga zurrunera, eta horrela Ostiral Santuko bake akordioari eustea.
