Koronabirusak adinekoen egoitzetan jo du bigarren oldean ere, eta etengabe handitzen ari da hildakoen kopurua. Beste hiru hildakoren berri eman zuten atzo. Bizkaiko Diputazioak jakinarazi du bi adineko hil direla azken egunetan, eta jadanik 67 edadeko zendu dira Bizkaiko zahar etxeetan bigarren olatua hasi zenetik. Arabako Foru Aldundiak ere eman du heriotza baten berri: Zuiako egoitza pribatu bateko egoiliar bat hil da, eta jadanik hamalau dira azken hilabeteetan herrialdeko zentroetan hilak. Gipuzkoan ez dute heriotzarik izan egoitzetan azken orduetan, baina kutsatzeak ez dira eten: beste bi egoiliarrek eman dute proban positibo, aldundiaren arabera.
Hain justu ere, adinekoen eguna izan zen atzo, eta, zahar etxeetako egoera salatzeko, protesta egin zuten Donostian Gipuzkoako Senideak, Irauli Zaintza eta Duintasuna taldeek, eta ELA eta LAB sindikatuek. «Helduen egoitzetako sistemaren porrota» salatu zuten, hilabeteotako kutsatzeak eta heriotzak ikusita.
Gipuzkoako zahar etxeetan lan gatazka betean ziren pandemia iritsi zenean. Eten egin zituzten protestak, baina berriro hastekoak dira: grebara deitua dute ELA eta LAB sindikatuek hilaren 6rako, nork bere aldetik.
