Pandemiaz geroztik eginiko «inbertsio handienetakoa bat» egingo du Japoniako SMC Corporationek Gasteizko bere lantokian. Autogintzarako osagaiak banatzen ditu handik Iberiako penintsula osora, eta aurrerantzean zentro horrek pisu handiagoa hartuko du, egun duen azalera %60 handituko baita. LKS Kreanek egingo du zabaltze lana, Mondragon taldeko ingeniaritza zerbitzuen kooperatibak; SMCk esan du enplegu gehiago sortuko duela Jundizko plantak, baina kopuru zehatzik eman gabe.
Datozen asteetan hasiko dira lanak, eta bi urteren buruan amaituta egotea espero du SMCk. Industriaren automatizazioaren atalean, munduko liderretako bat da Japoniako konpainia hori, batik bat autogintzari dagokionez. Duela 30 urte hasi zen zerbitzua ematen Euskal Herrian. Gasteizko lantokian 200 langile aritzen dira, baina lantaldea handitzea da asmoa 20 milioiko inbertsioaren harira.
