Roncaglia eta Calleriren golek hiru puntu garrantzitsu eman dizkiote Osasunari. Nafarroako taldeak 2-0 menderatu zuen Celta, Sadarren.
Bi taldeek antzeko hasi zuten norgehiagoka, baina, pixkanaka, Osasuna jokoan nagusitzen hasi zen, eta gorriek izan zuten aurretik jartzeko aukerarik garbiena. Lehen zatiko 23. minutuan sartu zuen partidako lehena Roncagliak, baloia bikain gurutzatu eta Celtako atezaina ezer egiteko aukerarik gabe utzita. Hala, 1-0 amaitu zen lehen zatia, beste aukera nabarmenik gabe.
Bigarren zatia hastearekin, euria ere agertu zen. Hasi berri, Callerik izan zuen lehen aukera, baina burukada langaren gainetik joan zitzaion. Bigarrengoan, ordea, ez zuen huts egin, eta ate barrura errematatu zuen Roncagliak jarritako erdiraketa. Ordurako, 76. minutua zen, eta Celtak ez zuen erreakzionatzeko gaitasunik izan.
Osasuna: Sergio Herrera; Roncaglia, Unai Garcia (Adrian, 90. minutuan), David Garcia, Iñigo Perez; Ruben Garcia, Oier (Nacho Vidal,
83), Torro, Kike Barja (Jony, 64); Calleri, Enric Gallego (Moncayola, 64).
Celta: Villar; Mallo, Aidoo, Murillo, Olaza; Baeza (Mor, 60), Okay, Tapia (Mina, 73), Denis; Aspas, Nolito (Rodriguez, 81).
