Gotzone Sagardui Eusko Jaurlaritzako Osasun sailburuak iragarri du asteartean hasiko direla gripearen aurkako txertoa jartzen arrisku handiko taldeetako kideei: 65 urtetik gorakoei, gaixotasun kronikoak dituztenei eta haurdun daudenei. Sagarduik azaldu duenez, Osakidetzak deituko die ordua emateko.
Gaixotasun kronikoak dituztenek ez ezik, egoitzetako pertsonek, osasun langileek eta gainerako herritarrek ere izango dute txertatzeko aukera. Sagarduiren hitzetan, osasun langileei jada txertoa jartzen hasita daude; gainerako herritarrek, berriz, urriaren 31tik aurrera izango dute horretarako aukera. Guztira, 558.000 dosi dituztela esan du, iaz baino heren bat gehiago, eta bi milioi euroko inbertsioa egin dute. Txertaketa kanpainak sei astean iraungo du, baina luzatzeko asmoa erakutsi dute, «hala behar izanez gero».
COVID-19ak ere utziko du bere arrastoa. Txertoa jartzeko, 300 leku ipiniko dituzte, eta horietako ehun Osakidetzak orain arte erabili ohi ez dituenak dira: frontoiak, karpak...
