Espetxe Zaindarien Sindikatuko bozeramailea da Olivier Bitte, eta Baionako presondegiko egoera salatu du: «Lau langile kutsatu dira; eta hainbat lankide bakartuak ditugu. Ulertezina da, aleatorioa da guztiz: denak izan gara kontaktuan, baina ez gaituzte denak bakartu». Langile zenbaitek PCR proba egin dute sintomak zituztelako, eta emaitzen zain dira.
Oraingoz, ez da presorik kutsatu, baina, Bitteren ustez «saihetsezina da». Kartzelara iristen diren presoek aste bateko itxialdia egin behar dute, baina ez du preso bakar batek ere PCR proba egin. Bakartua izateak eguneko aire hartzea egiteko arazoak sortzen ditu. Bitte: «Hamaika preso itxialdian dira oraingoz, eta bakarrik egin behar dute dena. Arazoa da airea hartzeko hiru ordutegi soilik badirela egunean zehar. Batzuk atera gabe egoten dira bi edo hiru egunez».
Presondegiko egoera sanitarioaren kudeaketarekin «haserre» agertu da Espetxe Zaindarien Sindikatuko kidea. «Baionako kartzelan gauden guztiok kontaktuan gara, etengabe. Gainera, kanpoko parte hartzaileak etortzen dira. Kudeaketa ez badute aldatzen, denak kutsatuko gara», deitoratu du.
