«Libiako historian arrastoa utziko duen» akordioa sinatu dute Libiako Ekintza Nazionaleko Gobernuak eta Tobrukeko Parlamentuak. Sei urtean herrialdean gerra zibila izan ostean, su-eten iraunkorra sinatu dute Genevan, bost eguneko negoziazioen ondoren. Nazio Batuen Erakundearen Libiari Laguntzeko Misioak bideratu ditu elkarrizketak, eta Stephanie Williams misioko buruak adierazi du bakea ekarriko duela Libiara: «Espero dut akordio honek Libiako herriaren sufrimendua amaitzea eta desplazatuak eta errefuxiatuak beren etxeetara bueltatzea ahalbidetzea, bakean eta salbu».
Akordioa sinatu duten bi alderdiak «pozik» agertu dira hartutako erabakiarekin. Libiako Ekintza Nazionaleko Gobernuko ordezkari Ali Abushahma koronelak deia egin die armadako kideei, «akordioa bete dadin ziurtatzeko, eta armada berriz egituratzeko, Libiako segurtasunaren aurka egiten dutenei aurre egin diezaien». Tobrukeko Parlamentuko Amhimmid Mohammed Alamamik, berriz, adierazi du «gogobeteta» dagoela lortutako erabakiarekin.
Sei urteko gatazkan, parez pare izan dira bai Akordio Nazionaleko Gobernua, zeinak NBEren onespena duen, eta bai Toburkeko Parlamentua, zeinak kontrolatzen duen lurraldearen zati handi bat.