Espainiako Osasun Ministerioaren Lurralde Arteko Kontseilua batzartu da gaur, eta, bertan, Eusko Jaurlaritzak zera eskatu dio Espainiako Gobernuari: molda dezala alarma egoeraren dekretua, «beharrezkoa balitz eta erkidego bakoitzaren egoerak hala aholkatzen duenean» etxeko konfinamendua ezarri ahal izateko. Gaur egun indarrean dagoen dekretuak ez du jasotzen aukera hori.
Ministerioak erantzun du «aztertu» egingo dutela, eta, ondoren eginiko agerraldian, Salvador Illa Espainiako Osasun ministroak baztertu egin du neurri hori ezartzeko aukera; esan du etxeko konfinamendurik ez dutela aurreikusten, «oraingoz».
Bestalde, Jaurlaritzak kontsulta egin dio Pedro Sanchezen gobernuari, ea, egun indarrean dagoen dekretuarekin, erkidegoek eskumena baduten etxeratze agindurako ezarrita dauden ordutegiak moldatzeko. Ministerioak erantzun du ez duela uste, baina kontsulta egingo duela.
Alarma egoera ezartzeko dekretuaren arabera, etxeratze agindua 22:00 eta 00:00 artean has daiteke, eta ordua muga horien barruan zehazteko eskumena eman zien erkidegoei. Illak berak gogorarazi du ezen, etxeratze orokor horretatik kanpo, erkidegoek eskumena dutela jarduera jakin batzuk eteteko edo ordutegi jakin batzuetara mugatzeko.
Labi EAEko Babes Zibileko Planaren aholku batzordea bihar batzartuko da, hilaren 26an hartutako neurrien eraginkortasuna aztertzeko eta ea neurri gehigarriak hartu behar diren kontsideratzeko.
