Iberdrolak 75.000 milioi euroko inbertsio plana iragarri du 2020-2025eko eperako, eta 20.000 kontratazio berri. Zehazki, inbertsio bolumen horren %90 (68.000 milioi euro) bere negozio eredua finkatzeko erabiliko du, energia berriztagarrietarako, gaur egun duen sarerako, biltegiratzeetarako eta bezeroentzako irtenbide adimendun gehiagotarako. Gainerako 7.000 milioi euroak PNM Resources konpainia amerikarraren erosketari dagozkio.
Ignacio Sanchez Galan buru duen taldeak jakinarazi du urtean batez beste 10.000 milioi euroko inbertsioa egingo duela, 2020tik 2022ra bitartean, eta 13.000 milioi eurokoa 2023tik 2025era bitartean.
Iberdrolak 2022ko aurreikuspenak gorantz berrikusi ditu. Mozkin garbia 4.000 milioi eta 4.200 milioi euro artekoa izan daitekeela uste du: 2018-2022 aldirako planean 3.700-3.900 milioien artekoa aurreikusi zuen.
2025erako, berriz, 15.000 milioi euroko ustiapen etekin gordina (EBITDA) lortzeko helburua jarri du. Horrek esan nahi du epealdiaren amaieran taldearen irabaziak ia %47 haziko direla, 2019an lortutako mozkin errekorrarekin alderatuta (3.400 milioi euro baino gehiago).
