Ez Realak, ez Eibarrek. Euskal taldeek ez dute asmatu igande goizean. Txuri-urdinak aurretik jarri dira Teneriferen aurka, baina aurkariek partidari buelta eman diote azken minutuetan. Armaginei, aldiz, bi penaltik kendu diete aukera oro.
Realaren eta Granadillaren arteko partidak ez du agintari garbirik izan lehen minutuetan. Nahikarik eman die, baina, txuri-urdinei beharrezko puntutxoa. Harenak izan dira lehen zatiko aukerarik garbienak. Quiñonesek agertu behar izan du, ordea, 44. minutuan, Martin Prietoren gola saihesteko.
Bigarren zatian, Nuria Mendozak eman du lehen abisua. Realaren gola, ordea, Granadillak sartu du bere atean. Ez dute asmatu Nerea Eizagirrek jarritako erdiraketa urruntzen, eta ate barruan amaitu du baloiak. Partida azken minutuetan sartu denean, Tenerifek hartu du partidaren lidergoa, markagailua iraultzeraino. 83. minutuan, partida berdintzea lortu dute, eta, hiru minutu geroago, Pojlakek bigarrena sartu du.
Nahi, baina ezin
Unben, gogotsu hasi du norgehiagoka Eibarrek, eta aukera sorta bat izan du lehen minutuetan. Ezin asmatu, baina, ate aurrean. Horiek hala, hutsean amaitu da lehen zatia.
Bigarrenak bestelako partida bat erakutsi du. Hasi bezain laster, epaileak Real Madrilen aldeko penaltia adierazi du, eta Asllanik ez du barkatu. Hamar minutu ere ez dira igaro beste penalti bat seinalatu duen arte. Berriz ere, Asllanik jaurti eta sarera. Eibar gerturatu da egin 70. minutuan, Thembiri esker, baina Marta Cardonak berriz urrundu du Real Madril: 1-3.
Atzeratuta
Athletic ere gaur eguerdian jokatzekoa zen, Espanyolen zelaian, baina partida bertan behera geratu da, Bartzelonako taldean hainbat COVID-19 positibo atzeman ostean.
