AEBetako presidenteak kargutik kendu duen bigarren goi arduraduna da zibersegurtasunekoa. Donald Trumpek azkenaldian ohikoa duen moduan jakinarazi du erabakia: Twitter bidez. Estatuburuak Christopher Krebsi leporatu dio «informazio okerra» ematea iruzur salaketen inguruan, eta salatu du «arau hauste ugari» egon direla hauteskundeetan: «Hildakoen izenean bozkatu du jendeak, eta begiraleei ez diete hauteslekuetan sartzen utzi».
The recent statement by Chris Krebs on the security of the 2020 Election was highly inaccurate, in that there were massive improprieties and fraud - including dead people voting, Poll Watchers not allowed into polling locations, “glitches” in the voting machines which changed...
— Donald J. Trump (@realDonaldTrump) November 18, 2020
Krebsek hauteskundeetako segurtasuna bermatzeko lanak zuzendu ditu azken bi urteotan, eta kanpoko esku hartzea saihesteko eta bozen aurreko asteetan zurrumurruak gezurtatzeko atari digital bat ere zabaldu zuen. Hain zuzen, atari horretan ziurtatu du behin baino gehiagotan azaroko presidentetzarako hauteskundeak «historiako seguruenak» izan zirela, eta ukatu egin du iruzurrik egon dela.
Krebs bera ez du ezustean harrapatu Trumpen erabakiak. Haren gertuko iturriek zabaldu dutenez, zibersegurtasunerako arduradunak ekainean esan zuen bozen ostean kaleratuko zutela ziurrenik, Trumpek galduz gero posta bidezko boto zenbaketaren aurka joko zuelako, eta baita horretarako modua eman zutenen kontra ere.
Krebs bera baino lehen, eta bozen emaitzak jakin eta egun gutxira, Mark T. Esper Defentsa idazkaria ere kargutik kendu zuen Trumpek. Bi buruzagien arteko harremana ekainean mikaztu zen, estatuburuak militarrak manifestarien aurka bidali izana kritikatu zuenean.
