Buruz buruko txapela jantzi eta bi urtera, Jokin Altunak txapelketako finala jokatuko du berriz aurten, Erik Jakaren aurka, hilaren 29an, Bilboko Bizkaia pilotalekuan. Pilotariak igandean lortu du finalerako sailkatzea, bigarren finalerdian Dario Gomezi nekez irabazi ondoren.
Dariok sakearekin hasi du partida, eta, berehala, 0-3 aurreratu da markagailuan. Lehen tantoak azkarrak eta lehiatuak izan dira. Altunak, baina, ez du amore eman, eta hiruna berdindu du markagailua. Horren ondoren, beste bost berdinketa izan dira partidan: zazpina, hamarna, hamaikana, hamalauna eta hamabosna.
Dariok sake bortitza erabili du, eta abiadura handiz mugitu da kantxa osoan. Ondorioz, Altunak lanak izan ditu partida irabazteko. Amaieran handitu du tartea, eta hamabost tantoan utzi du aurkaria.
Bezperan, Jakak 6-22 irabazi zion Danel Elezkanori, eta aurreneko aldiz sailkatu zen Banakako Txapelketako finala jokatzeko. Azken hamazazpi tantoak segidan egin zituen.
Pilotakadak. 264. Iraupena. 56,18 minutu. Sakeak. Altuna III.ak 5; Dariok 4. Egindakoak. Altuna III.ak 9; Dariok 8. Galdutakoak. Altuna III.ak 3; Dariok 8. Markagailua. 0-3; 7-3; 7-10; 11-10; 11-11; 13-11; 13-12; 14-12; 14-15; eta 22-15. Bestelakoak. Osasun egoera dela eta, ikuslerik gabe jokatu zen partida.
