Joe Bidenek AEB Ameriketako Estatu Batuetako presidentetzarako hauteskundeak irabazi eta hiru astera, Donald Trump egungo presidenteak haren gobernuari ezarri zion blokeoa kendu du bart, boterea eskualdatzea baimenduz. Oraindik ez du Bidenen garaipena jendaurrean onartu, eta hauteskunde iruzurraz hitz egiten jarraitzen du, baina gaueko erabakia hiru astean egin duen urratsik handiena da.
Onarpen horren ondoren iritsi da GSA Zerbitzu Orokorren Administrazioaren egiaztagiria, eskualdatzea abian jartzeko beharrezko tramite bat, eta Bidenek adierazi du datozen egunetan hasiko direla Trumpen gobernuko langileekin bilerak egiten.
Trumpek txiokatu zuen iruzurraren gaineko bide judizialarekin jarraituko dutela, eta Bidenek trantsizioa hasteko gutuna jaso zuen. «Nire lana serio egiten dut, eta azkenaldian izandako gertakarien artean auzi legalak eta bozetako emaitzen egiaztapenak egon dira. Gaur idazten dizut, adierazteko baliabide eta zerbitzu horiek zure esku daudela», jartzen zuen Emily Murphy GSAko buruak izenpetutako gutunak. Murphyk esan du inork ez diola «agindu» erabakia horrenbeste atzeratzerik, baina berak eta beraren familiak mehatxuak jasan dituela salatu du.
Hortaz, demokraten eskualdatzerako taldeak inteligentziari eta administrazioko langileei buruzko informazioa eskura izango du aurrerantzean.