Soraluzen bihar egingo dituzte PCR probak, osasun zentroan, 15:00etatik 19:00etara. Probak egin nahi dituzten herritarrek hitzordua eskatu beharko dute 943-032644 telefonoan edo Aholku sanitarioaren telefonoan 900-203050. Gaurtik aurrera eskatu ahal izango da hitzordua.
Elgoibarren, berriz, ostegunean eta ostiralean hartuko dizkiete laginak herritarrei, 15:00etatik 19:00etara. Herritarrek Elgoibarko osasun zentrora joan beharko dute probak egitera. Aldez aurretik hitzordua eskatzeko, telefono hauetara deitu beharko dute: 943-032644 edo 900-203050.
Nafarroako Gobernuko Osasun sailak, berriz, Cascanteko 15 eta 64 urte arteko herritarren artean egingo du baheketa, ostegunean eta ostiralean. Tuterako osasun eremuko profesionalek eta Osasunbideko larrialdietarako zerbitzuko kideek egingo dituzte probak. Nafarroako Gobernuak ohar batean jakinarazi duenez, PCR probarik ez dute egin beharko azken hamar egunetan PCR proba bat egin dutenek, eta azken hiru hilabeteotan antigeno edo PCR testean positiboa eman dutenek.
