Gora egin dute kutsatu kopuruak eta positibo tasak Hego Euskal Herrian. Eusko Jaurlaritzako eta Nafarroako Gobernuko datuen arabera: 807 kutsatu zenbatu dituzte azken 24 orduetan, egindako proba guztien %5,7. Asteazkenean zenbatutako datuekin alderatuta, okerrera egin dute, igoera nabarmena izan ez bada ere: zortzi kutsaturen aldea egon da egun batetik bestera, eta positiboen ehunekoa %5,2tik %5.7ra igo da. Aipatzekoa da aurreko egunean baino ia 1.200 PCR eta antigeno proba gutxiago egin dituztela.
Azken egunean positiboen igoera txiki bat izan bada ere, datuek bilakaera positiboa izan dute astean zehar. Asteleheneko %9,6ko positibo tasatik lau puntu jaitsi da Hego Euskal Herria: OMEk “izurria kontrolpean” izaten hasteko ezarritako %5eko positibo tasaren mugarritik hurbil.
