Eusko Jaurlaritzak eta Nafarroako Gobernuak emandako datuen arabera, Osakidetzak eta Osasunbideak 7.443 proba egin zituzten atzo, eta 518 kasu atzeman dituzte, bezperan baino 62 gutxiago, alegia. Hala eta guztiz ere, aipatzekoa da egun bakarrean egindako test kopuruak izandako beherakada. Bezperan 10.637 proba egin ziren birusa atzemateko, hau da, 3.000 gehiago. Gainera, azken datuen arabera, positiboen ehunekoa %7koa da Hegoaldean.
Kutsatzeen datuei dagokienez, Bizkaian atzeman dute positibo gehien igandean egindako testetan: 206 izan dira, bezperan baino 11 gutxiago. Gipuzkoan 177 kasu zenbatu ditu Osakidetzak, aurreko egunean baino 33 gutxiago, eta, aldiz, Araban 45 izan dira azken egunean, bezperan baino 34 gutxiago. Hala, Bizkaian, Gipuzkoan eta Araban, hiruretan egin du apaltzera positibo kopuruak. Hori horrela, Hegoaldeko lurraldeetatik Nafarroan bakarrik hazi da kasu kopurua: han, Osasun Departamentuak argitaratutako datuen arabera, 83 kasu atzeman dituzte igandean. Zehazki, COVID-19a atzemateko 976 proba egin ziren foru erkidegoan, eta egindako testen %8,5ek eman dute positibo. Azken asteko datuen aldean, ehunekoak nabarmen egin du gora azken egunean, eta, beraz, urrundu egin da Osasunaren Munduko Erakundeak izurritea kontrolpean eduki ahal izateko ezarria duen mugarritik: %5. Osakidetzak egindako testen gaineko positiboen ehunekoa, berriz, %6,7koa dela esan du Jaurlaritzak.
Gainera, Nafarroako Gobernuak jakinarazi du azken egunetan lau pertsona zendu direla foru erkidegoan. Hain zuzen ere, atzo hil ziren horietatik hiru, eta beste pertsona bat aurreko egunetan zendu zela argitu du gobernuak. Emandako datuen arabera, 71 eta 88 urte bitartekoak dira zendutako pertsonak; bi gizonezko eta bi emakumezko.
Ospitaleen egoera
Osakidetzak eta Osasunbideak emandako datuen arabera, azken egunean 26 lagun eraman dituzte erietxera Hegoaldean. Hain zuzen ere, Nafarroan ospitaleratu dituzte horietako bi, eta Araban, Bizkaian edo Gipuzkoan eritxeratuak dira gainerako 24ak. Halaber, oraintxe bertan guztira 714 lagun daude ospitaleetan; horietatik 543 gela arruntetan daude, eta, aldiz, 171 lagun daude ZIU zainketa intentsiboetako unitateetan.
