Euroguneko Ekonomia eta Finantza ministroek (Eurotaldea) erreskate funts iraunkorraren (ESM) erreforma onartu dute: 2022. urte hasieratik «segurtasun sare» bat eskainiko die Europako banku nagusiei, porrotak gertatuz gero, erreskatatu ahal izateko.
ESMk funts bat izango du haientzat, eta hori erabiliko litzateke egun euroguneko finantza erakundeek beren artean laguntzeko hornitzen duten erreserba kutxa amaituko balitz. 2022. urterako egongo litzateke prest, aurreikusi baino urtebete lehenago, eta 65.000 milioi euro inguruko hornidura izango luke.
Horrekin batera, erreformak ESMren eskumenak indartzen ditu: erakunde horrek gainbegiratze eskumen handiagoa izango du bere erreskate funtsaren laguntza eskatzen dioten herrialdeen gainean. Horra iritsi aurretik, baina, arazoak dituzten estatuek kreditu lerro prebentibo bat eskatzeko aukera izango dute, baldintza jakin batzuetan.
Erreforma iazko udan adostu zuten, baina Italiaren errezeloek eta COVID-19aren krisiak atzeratu dute onartzea. Orain, estatu bakoitzak bere barnean berretsi beharko du erabakia. Urtebete inguru iraun dezake prozesuak.
