Indartsu hasi dute Binakako Txapelketa Peña II.a-k eta Albisuk: sailkapeneko liderrak dira oraintxe. 22-8 irabazi zieten atzo Urrutikoetxeari eta Imazi, eta aldea handiagoa ere izan zitekeen irudipena zutela amaitu zuten urdinek neurketa.
Izenak ikusita, Peñak eta Albisuk osatutakoa txapelketako bikoterik ahulenetakoa zela zirudien joan den asteko aurkezpenean. Ez hori bakarrik: Peña txapelketan sartu izanak, Oinatz Bengoetxea kanpoan utzita, ika-mika piztu zuen zaleen artean. Tolosarrak ez zituen nahi bezalako emaitzak eskuratu buruz buruko eta lau eta erdiko txapelketetan, baina, oraingoz, frontoian erakutsi ditu Baikok bere aldeko apustua egin izanaren arrazoiak.
Bikain jokatu zuen atzo Peñak, tantoak ondo bukatuz, eta zer esanik ez Albisuk. Bera izan zen jaun eta jabe kantxan, eta, atzeko koadroak dominatzeaz gainera, sei tanto amaitu zituen. 7-0 hasi ziren irabazten, baita 2-15 ere, eta neurketaren hondarrean soilik erakutsi zuten euren jokoa Urrutikoetxeak eta Imazek. Berandu.
