Zaldibarko (Bizkaia) Verter Recycling 2002 SM zabortegia amildu zenetik hamaika hilabete bete dira gaur, eta, hori dela eta, Zaldibar Argitu plataformak deituta mobilizazioak egin dituzte hainbat herritan. Plataformaren arabera, Joaquin Beltran eta Alberto Sololuze luiziaren ondorioz desagertutako beharginak oroitzen jarraituko dute. «Lanean segituko dugu gaia ez ahazteko, gure osasunaren eta ingurumenaren defentsan, erantzukizun pribatu zein politikoak argitu arte».
Zaldibarren, Etxebarrin, Zallan, Ermuan (Bizkaia), Eibarren eta Elgetan (Gipuzkoa) egindako mobilizazioetan kritikatu dute azkeneko 11 hilabeteotan arduradun publiko zein pribatuak «isilpean» egon direla, ardurak haien gain hartu gabe. Galdetu dute, gainera, ea zein «zilegitasun» daukan Iñaki Arriolak kargu publiko batean segitzeko. Luizia gertatu zenean Eusko Jaurlaritzako Ingurumen sailburua zen, eta joan den irailetik Lurralde Plangintza, Etxebizitza eta Garraio sailburua da. «Nola da posible?».
