«Jaitsiera handia da, logikoa, pandemiak eragindako krisi ekonomiko gogorraren testuinguruan. Baina maiatzean espero zitekeen baino txikiagoa izan da, maiatzean %20ko balizko jaitsiera baten iragarpenak baikenituen», Elma Saiz Nafarroako Gobernuko Ekonomia kontseilariak balantze gazi-gozoa egin du 2020ko zerga bilketa azaltzean. Izan ere, zerga bildutako dirua jaitsi da, baina ez espero adina. 2019an 3.941 milioi euro bildu zituen; iaz, aldiz, 3.627 milioi, %8 gutxiago.
Jaitsieraren azalpena zeharkako zergetan egon dela azaldu du kontseilariak. «Aurreikuspen guztiak berregin behar izan ditugu. Lanaren atxikipenetan igoera txiki bat egon da; aldiz, jaitsiera orokortua izan da kontsumoaren bilakaerarekin harremana duten zergetan [BEZa eta zerga bereziak]». Azalpena datuetara eramanda, zerga zuzenetan %1,2ko jaitsiera egon da bakarrik; zeharkakoetan, aldiz, %14,6koa. Ogasunaren datuen arabera, COVID-19aren eragina txikia izan da Nafarroako Ogasunak bere kasa biltzen dituen zergetan (-%1,5); aldiz, Espainiaren bitartez bildutakoetan %24koa izan da.
Zerga garrantzitsuenei erreparatuta, PFEZaren bitartez bildutakoa oso gutxi jaitsi zen iaz: %0,4 baino ez 2019ko datuekin alderatuta. BEZak, berriz, gehiago nabaritu du krisia: -%3,5. 2019ko 1.464 milioietatik iazko 1.413 milioietara igaro zen. Dena den, esportazioen jaitsierak %10 murriztu ditu itzulerak. Beraz, kudeaketa zuzenez jasotako BEZak %25,4ko igoera izan du 2019arekiko. Azkenik, zerga bereziei dagokienez —hidrokarburoak, alkoholak...—, %16,5eko jaitsiera izan zuten.
Diru bilketaren datuekin batera, Saizek aurrekontuen itxierakoak aurreratu ditu, eta, datu gehiagoren zain, %1,05 eta %1,15 arteko defizita iragarri du. «Zerga bilketarekin gertatu bezala, datua espero baino hobea da, baina txarra era berean, azken urteetako joera positiboa eten baita».