Goizetik, tentsioa da nagusi Gasteizko Herrandarren kaleko 15. atarian. Uztailaz geroztik, hamabost pertsona inguru bizi dira eraikin horretan, hamar urtez hutsik egon den eraikin hori okupatuta. Jakina zen gaur kaleratuko zituztela, eta goizetik hainbat auzotar bildu dira han, kaleratzen ari diren bizilagunei babesa ematera.
Udaltzain eta ertzain asko ere bertaratu da. Ia ordubeteren ostean, udaltzainek barrura sartzea lortu dute, atean zulo bat eginda, eta Ertzaintzak bertaratu direnen aurka egin du. Azken informazioen arabera, gutxienez bi lagun atxilotu dituzte.
Blokeak hiru solairu ditu; lehenengoa husten ari dira orain, bertan daudenak identifikatzen eta etxetik aterarazten. Oihuak entzuten dira barrutik, eta, etxetik atera dituztenek adierazi dutenez, Polizia barnekoak «itotzen» ari da.
Barruan zeuden kideetako batzuk ateratzen hasi dira, kanpoaldean daudenen oihuen artean. Polizia barnekoak «itotzen» ari dela jakinarazi dute @berriapic.twitter.com/rgFsnwvHij
— Amaia (@amaianaaiz) January 26, 2021
Zuloa egin aurretik, eraikinaren kanpoaldean zeudenak eraman egin dituzte handik, eta atea irekitzen saiatu da Polizia. Kaleko errepide nagusia ere itxi dute ertzainek eta udaltzainek.
Gasteizko Etxebizitza Sindikatuak salatu du «etxebizitza lortzeko beste aukerarik gabe» daudela hor bizi direnak, eta babesa ematera joan da. Sindikatuko kide Karlak BERRIAri adierazi dio gizarte zerbitzuekin harremanetan daudela, eta «etxegabetzea atzeratzeko» eta «egiazko konponbide bat» emateko eskatu dietela. Beharrezkotzat jo ditu bi eskaerak, hamabost pertsona «kale gorrian» gera ez daitezen: «Oraindik badago denbora».
Egoeraren berri eman digu @EtxeSindikatua-ko kidea den Karlak. Bien bitartean, atea ireki nahian jarraitzen dute @berriapic.twitter.com/zwll8Fig5C
— Amaia (@amaianaaiz) January 26, 2021
