Ekologistak Martxan-ek jakinarazi duenez, bai haiek bai beste hainbat entitate onartu ditu Durangoko Instrukzioko 1. Epaitegiak, Zaldibarko zabortegian (Bizkaia) ingurumenaren aurka deliturik egin ote den ikertzeko kausan. Ekologisten arabera, beste entitate horiek dira «bi ingurumen elkarte», Zaldibar, Ermua (Bizkaia), Eibar eta Elgetako (Gipuzkoa) udalak, Interbiak Bizkaia SA sozietatea, Allianz Seguros, eta joan den otsailaren 6an gertatutako luizian desagertutako bi langileetako baten senideak.
«Ingurumen elkarte» horiek dira GuraSOS eta Euskal Herriko Eskubide Sozialen Aldeko Plataforma. Azken horrek eta Zaldibar Argitu herri plataformak elkarrekin aurkeztu zuten herri akusazioa, joan den urrian. Eskubide Sozialen Kartaren iturri judizialek Berria-ri adierazi diotenez, oraindik ez dute jakinarazpen ofizialik jaso. «Baina pentsatzen dut laster esango digutela».
Prozesuan jarraitu ahal izateko, bai haiei, bai GuraSOSi, baita plataformei ere epaitegiak 500 euroko bermea eskatu dietela zehaztu du Ekologistak Martxan-ek ohar batean. «Eskatutako bermea neurritsua den arren, gure ustez, ez zen bermerik adierazi behar; edo sinbolikoa izan beharko luke». Elkarteak nabarmendu du laguntza ekonomikoa lortze aldera «herri kanpaina» martxan jartzea pentsatzen ari direla.
Uste dute ekologistek «motelegi» doala prozedura judiziala. «Ondorioz», sindikatu, erakunde ekologista, auzo elkarte eta bestelako eragile ugarik bultzatutako U30 Aldaketaldia dinamikak biharko Araban, Bizkaian eta Gipuzkoan antolatutako mobilizazioetan parte hartzera deitu du. «Larrialdi klimatiko, ekologiko eta soziala» salatu eta «trantsizio ekologiko eta sozialki justua» eskatuko dute. Ekologistak Martxan-ek, gainera, otsailaren 6an, zabortegiaren amiltzearen urteurrenean, Zaldibar Argitu plataformak antolatuko dituen mobilizazioak babesten ditu, eta horiekin bat egitera deitu du.