Jipoi handia hartu zuten atzo Jakak eta Martijak. Olaizola II.ak eta Rezustak osatutako bikoteak ez zien jokatzeko aukerarik ere eman, eta hasieratik amaierara kontrolpean izan zuten partida. Hainbesteraino, aspaldi ikusi gabeko markagailu batekin amaitu baitzen: 22-2.
Hasteko, urdinek hamabost tanto egin zituzten jarraian, eta Jakak ez zuen pilotaren atzetik ibili beste aukerarik izan, Olaizolaren erremateen aurrean. Goizuetarrak hamahiru tanto egin zituen. Atzean ere Rezusta izan zen nagusi. Martijak, lesiotik itzuli berri, ez zuen asmatu pilotari ongi jotzen, eta urdinek egoera aprobetxatu zuten. Hala, partidako lehen tantoa egiterako 15-1 atzetik ziren; gero, 17-2, eta hortik amaieraraino, berriz, ere urdinak nagusi.
Hala, Olaizola II-Rezusta bikotea sailkapeneko lidergora iritsi da, Elezkano II.a eta Zabaletarekin berdinduta, lau partida irabazita. Jaka eta Martija, berriz, zuloan dira, azken-bigarren postuan, behin bakarrik irabazita.