Antsoainen Haur Eskola Euskalduna plataformak jakinarazi duenez, udalak jakinarazi berri die datorren ikasturtean euskarazko adarra eskainiko dutela bertako haur eskolan. Uztailean udalarekin elkartu zirenean baieztatu zien aukera hori, eta aste honetan ofizialki jakin dute. Ohar bidez eman dute albistearen berri, eta baita balorazioa ere: “Pozik gaude udalak hartutako erabakiarekin, urte luzez herriko haurrei herrian euskara ezagutzeko eta euskaraz hezteko eskubidea ukatu baitzaie”. Hiru urtez borrokan aritu direla gogoratu dute, eta argi utzi hori izan dela euskarazko eredua lortzeko gakoa: “Ziur gara mobilizaziorik gabe ez ginatekeela egoera honetan egongo”.
Antsoaingo udalarekin izandako bileran jakin dutenez, euskal adarra modu progresiboan ezarriko dute herrian. 2021-2022ko ikasturtean txikienekin hasiz, eta hurrengo ikasturteetatik aurrera 0-3 ziklo osoa D eredukoa izateraino. “Guri, herri egitasmoa martxan jarri genuen gurasoon haurrei, neurriak ez digu zuzenean eragingo. Baina guretzat une honetan garrantzitsuena hau da: herriari eta hurrengo belaunaldiei egingo diegun ekarpena”.
Era horretan, guraso berriak animatu nahi izan dituzte euskarazko adarraren alde egin dezaten eta D ereduan matrikulatu ditzaten seme-alabak. Azkenik, dei argia egin dute Nafarroa osoan D eredua lortzeko borrokan jarraitzeko: “Antsoainen aldaketa borrokaren bidez lortu da, Mendigorrian ere bai... Jarrai dezagun euskaltzaleok dagozkigun hizkuntza eskubideen aldeko domino efektua herriz herri hauspotzen”.
