Nafarroak ez ditu espetxeko eskumen osoak, baina haren esku dago zigorrak nola betearazi, eta kartzela zigorra azken aukera izatea du asmo. Horixe da, hain zuzen, espetxe zigorrak betearazteko Nafarroako Gobernuaren ereduaren helburu nagusietako bat. Eduardo Santos Justizia eta Migrazio Politiken kontseilariak gaur aurkeztutako dokumentuaren arabera, kartzela zigorren ordez «neurri alternatiboak» lehenetsi behar dira. Izan ere, ereduak jaso dituen lau ildo estrategikoak aintzat hartuta, kartzeletan daudenen bizitza hobetu eta haien eskubideak bermatu nahi ditu Nafarroako Gobernuak, asmotzat edukita zigortutako pertsonen gizarteratzea eta erregimen erdi irekiak indartu ahal izatea.
Santosen esanetan, ereduan proposatutakoaren bidez «integratu» egingo dira «espetxeko populazioari» emandako zerbitzuak; haiei emandako arreta «hobetu» egingo da, eta «prozesu guztiek» gizarteratzea izango dute asmo. Kontseilariarentzat, ereduak ez ditu gizartetik «aldentzen» askatasunik gabe utzi dituzten pertsonak. Iruditzen zaio kartzelak «gizarte horren partetzat» hartu behar direla. Dokumentuan, gainera, kontuan hartu dute eredua modu eraginkorrean ezarri ahal izateko beharko zen antolaketa administratiboa.
Azkeneko zortzi hilabeteotan ondu dute gobernuak plazaratutako eredua. Hamabi pertsonak osatutako talde batek landu du 130 orrialdeko dokumentua, eta tartean ziren, Santosez gain, abokatuak eta, besteak beste, espetxeratutakoekin lan egiten duten elkarteak.
«Justizia sendagarria»
Aste honetan, hain zuzen, Zigorra Betearazteko eta Justizia Errestauratiborako Zerbitzua sortu du Nafarroako Gobernuak, eta Justiziaren Zuzendaritza Nagusiaren menpe egongo da. Santosek bulego berri horren «garrantzia» nabarmendu du: «Zerbitzu publikoa, zerbitzua herritarrei, espetxeko populazioari, eta delituen biktimei».
Kontseilariaren iritziz, «gizarte hobe bat» eraikitzen lagunduko duen «justizia sendagarriaren aldeko apustua» egin du foru gobernuak. Aurrera eraman nahi duten ereduaren bidez, iruditzen zaio «gatazken konponketan» «agente aktibo» izateko aukera edukiko dutela aldeek.
