Azken orduetan berriro egin dute gora koronabirusaren kutsatzeek Hego Euskal Herrian. Eusko Jaurlaritzako eta Nafarroako Gobernuko osasun departamentuek emandako datuen arabera, atzo beste 448 positibo atzeman zituzten egindako proba diagnostikoetan. Koska bat egin dute gora, beraz, positiboek, azken egunetako goranzko joeran. Lurraldez lurralde, Araban 44 positibo atzeman zituzten atzo; Nafarroan, 68; Gipuzkoan, 138; eta Bizkaian, 196.
400 kasuren langa atzean utzi zuen Hegoaldeak martxoaren 2an, baina berriz igaro du. Positibo tasa ere igo egin da: egindako 9.198 proba diagnostikoetatik %4,8 izan dira positibo. OMEk izurria kontrolpean izaten hasteko ezarria duen %5eko langaren azpitik dago oraindik tasa, baina muga horretatik gero eta gertuago.