Eusko Jaurlaritzak eta Nafarroako Gobernuak eguneratu egin dituzte egoera epidemiologikoari buruzko datuak, eta, emandako informazioaren arabera, Hegoaldeko positibo tasa %4ra jaitsi da. Izan ere, atzo 9.990 proba diagnostiko egin zituzten, eta horietatik 407k eman zuten positibo; %4k, beraz. Bezperako datuekin alderatuta, apur bat behera egin dute positiboek. Lurraldeka, Nafarroan 51 positibo detektatu zituzten atzo; Araban, 56; Gipuzkoan, 100; eta Bizkaian, 188. Beste 12 kasuak EAEtik kanpo dauden herritarrenak dira.
Osakidetzak Arabako, Bizkaiko eta Gipuzkoako ospitaleen egoeraren berri eman du: atzo beste 46 lagun ospitaleratu zituzten gaitzak jota, eta ZIUetan 95 lagun daude larri. Osasunbideak arratsaldean emango ditu ospitaleratzeei buruzko datuak.
