Connect Group Belgikako taldeak Ikor euskal enpresa erosi du. Zirkuitu elektronikoak diseinatu eta fabrikatzen ditu Ikorrek, eta Donostian du egoitza. Han dauzka ekoizpen planta bat eta zentro teknologiko bat, 272 langilerekin. Gainera, beste lantegi bat dauka Mexikon (250 langile), eta beste bat Txinan (273 langile).
Urtebetean bigarren aldia da Ikorren jabetza eskuz aldatzen dutena. Iaz, Ebm-papst Alemaniako taldeak erosi zuen osorik. Aurtengo otsailean 21 langile kaleratuko zituela iragarri zuen, arrazoi ekonomikoak argudiatuta.
Salmenta berria datozen egunetan itxiko dute. Ikor Connect Groupeko kide izatera pasatuko da, eta aurreko jabeak partaidetza minoritarioa izango du enpresaren akzioetan.
Marco Duarte Ikorreko arduradunaren hitzetan, «garrantzitsuena» da operazioak bi enpresei aukera gehiago emango diela bezero gehiago erakartzeko eta orain artekoei eskaintza zabalagoa emateko.
Connect Group 1987an sortu zen, eta produktu elektronikoen fabrikazioan aditua da. 2.000 langile inguru ditu, eta hainbat ekoizpen zentro ditu bost herrialdetan banatuta. Belgikan, Herbehereetan eta Alemanian ditu salmenta bulegoak.
