Eusko Legebiltzarreko osoko bilkuran, Iñigo Urkullu lehendakaria itxaropentsu agertu da COVID-19aren kontrako txertaketa kanpainari begira. Urkulluk adierazi du Araban, Bizkaian eta Gipuzkoan bizi diren 50 urtetik gorako herritarrak txertatuak izan daitezkeela uda hasten denerako, baldin eta txertaketa erritmoak gaur egungoari eusten badio. Azaldu du «itxaropen funtsatua» duela kanpainarengan, eta, gainera, argitu du susmoa duela datorren hilabeteetan prozesuak ez duela hainbeste eragozpen izanen.
Jaurlaritzako Osasun Sailak emandako azken datuen arabera, orain arte 740.000 dosi jarri dira Araban, Bizkaian eta Gipuzkoan. Osakidetzak gaur egun dituen baliabideei buruz ere mintzatu da lehendakaria: «Egoera larria eta kezkagarria da oraindik ere. Aldiz, prest gaude, eta nahikoa baliabide dugu maratoiaren azken zatian emaitza onak erdietsita aurrera egiteko».
