Mendia

Iazko abuztuan Suitzan galdutako mendizale nafarraren gorpua topatu dute

Diego Maeztu eta beste hiru euskal herritar Parlitobelgo arroila jaisten ari ziren, ekoitz batek errekako urak handitu zituenean. Hiruren gorpuak berehala aurkitu zituzten, baina Maezturen arrastorik ez zegoen geroztik.

Erreskate operazioa Parlitobelgo arroilan, iazko abuztuan. GIAN EHRENZELLER / EFE
Edu Lartzanguren.
2021eko maiatzaren 18a
07:59
Entzun

Bederatzi hilabete pasatu dira iazko abuztuaren 12an istripua gertatu zenetik, eta, azkenean, Diego Maeztu Alloko (Nafarroa) mendizalearen gorpua aurkitu dute Suitzan. Joan zen astean agertu ziren gorpuzkiak, eta DNA probak egin dizkiote bitartean. Azkenean, ondorioztatu ahal izan dute Maeztu zela.

Senideek gorpua Euskal Herriratzeko tramiteak hasi dituzte.

Maeztuz gain, beste hiru euskal herritar hil ziren istripuan. Uharte Arakilgo (Nafarroa) Mikel Zabalza (30 urte), Gueñesko (Bizkaia) Andoni Gonzalez (48 urte), eta Maezturen herrikide Mikel Lasa (33). Sei laguneko taldean zeuden, baina beste bi lagunek, istripua izan baino lehenago, beste bide bat hartzea erabaki zuten.

Ekaitza 18:10ean hasi zen arroilan, ordu eta erdi iraun zuen, eta, guztira, 25-30 litro jausi ziren metro koadroko. Gauean hiru mendizaleren gorpuak aurkitu zituzten, arroila amaitzen den Gigerwald lakuaren inguruan. Kantonamenduko Poliziak azaldu zuenez, ekaitzak sortutako uholdeak eraman zituen haraino. 100 pertsonak baino gehiagok hartu dute parte erreskate lanetan, baina ez zuten lortu laugarren mendizalearen gorpua topatzea.

Esperientzia handiko kirolariak ziren. Esaterako, Sakon Espeleo Taldeko kidea zen Mikel Zabalza, eta Azpigorri mendi taldeko kide eta arroilen argazkilari ezaguna ere bai Andoni Gonzalez.

Iruzkinak
Ez dago iruzkinik

Ordenatu
0/500
Interesgarria izango zaizu
Nabarmenduak
Orain, aldi berria dator. Zure aldia. 2025erako 3.000 babesle berri behar ditugu iragana eta geroa orainaldian kontatzeko.