Pandemia garaiko hirugarren ikasturtea hasiko dute irailean Arabako, Bizkaiko eta Gipuzkoako zentroetan. Datorrenari so, Eusko Jaurlaritzako Hezkuntza Saila jadanik hasia da iragartzen zein izanen diren ikasturteari aurre egiteko eskura jarri beharko diren baliabideak. Batik bat, Jokin Bildarratz Hezkuntza sailburuak adierazi du «zuhurtziaz» jokatuko dutela, eta argitara atera du irakasle kopuruaren gainean hartutako erabakia: «COVID-19ari kontra egiteko, 1.064 irakasle postu sortu ziren joan den ikasturtean. Datorrenean, postu horiek bere hartan segituko dute, pandemiaren eragina bestelakoa den arren». Neurria ikasturte osoan izanen da indarrean; abuztura arte, alegia.
Gainera, Bildarratzek jakinarazi duenez, baliabide materialetan ere gertatuko da indartzea. Sailburuak azaldu du 100.000 ordenagailu baino gehiago emanen direla bi ikasturtetan erabiltzeko.
