Politikoak, txirrindulariak eta futbolariak
Jendaurrean erakutsi beharreko zordun handiak zeintzuk diren erabakitzean bi jarrera hartu zituzten ogasunek. Zorraren muga milioi bat euroan jarrita, zerrenda murritzagoa erakustera jo zuten Arabako, Bizkaiko eta Gipuzkoako ogasunek. Horren ondorioz, porrot egindako enpresak dira hor nagusi, eta gutxi dira izen propioekin agertzen direnak, haientzat zailagoa baita halako zulo bat eragitea ogasunari.
Zerrenda zabalago baten hautua egin zuen Nafarroak, eta gutxieneko muga 120.000 euroan jarri zuen. Ondorioz, zerrenda nabarmen luzeagoa da —673 lagun daude Nafarroan, 242 beste hiru lurraldeetan—, eta lautik bat dira norbanakoak. Haien artean, pertsona ezagun asko daude, Gabriel Urralburu presidente ohia (426.700 euro) eta haren emazte Olivia Balda (440.500) buru dituztela. Ignacio Gallipienzo Eguesibarko alkate ohiak, berriz, 122.200 euro zor dizkio Ogasunari.
Soldata handiak jaso bai, baina zegozkien zergak ordaindu ez zituzten kirolari batzuk badira. Vladimir Karpets txirrindulari ohiak eta haren emazte Tatiana Karpetsek 989.000 euro zor dituzte, eta Denis Mentxov txirrindulariak eta Nadezna Menxova emazteak (707.000). Osasunako hiru jokalari ere ageri dira: Walter Pandiani (124.300), Krisztian Vadocz (153.300) eta Pizo Gomez (219.800).
Astekaria
Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.
