EFE berri agentziak jakinarazi duenez, hil egin da joan den igandean Irunen (Gipuzkoa) botila batekin zauritutako gaztea. Goizaldeko hirurak aldera gertatu zen erasoa, berri agentziaren arabera: Udaltzaingoa eta Ertzaintza Urdanibia plazara joan ziren, «talde borroka» bat gertatzen ari zela-eta, eta lurrean atzeman zuten mutila, konorterik gabe.
Lekuko batzuen arabera, minutu batzuk lehenago gertaturiko borroka batean jo zuten gaztea, buruan kolpe bat emanda botila batekin. Zaurituriko mutila Donostia ospitalera eraman zuten segidan, larri, eta ustezko erasotzailea atxilotu zuten ondoren: 18 urteko mutil bat. Gaur zendu da zaurituriko gaztea.
