Sute bat piztu zen atzo gauean Iruñeko Arrotxapea auzoko Joaquin Beunza kaleko eraikin bateko etxebizitza batean. Garrak itzaltzera joan ziren suhiltzaileak, eta etxearen barruan 44 urteko gizonezko baten gorpua topatu zuten.
Nafarroako Gobernuaren informazioaren arabera, SOS Deietara deitu zuten hainbat bizilagunek 21:00ak inguruan, jakinarazteko ke lodi bat ateratzen ari zela etxebizitzatik. Suhiltzaileak iritsi ziren, barrura sartu ziren, eta gorpua topatu zuten sarrerako atetik oso gertu. Bi koltxoi erretzen ari ziren logeletako batean, eta handik zetorren kea.
