Ezin arintzerik antzeman. Beste behin, transmisioa larriagotzen ari dela erakusten dute Hegoaldeko osasun sistemek argitara ateratako datuek. Nafarroako Gobernuak eta Eusko Jaurlaritzak emandako informazioaren arabera, atzo 14.312 diagnostiko proba egin ziren Hegoaldean birusa detektatzeko, eta 1.980 kutsatu zenbatu zituzten horietan. Zehazki, egun bakarrean egindako testen %13,8k eman zuten positibo Hego Euskal Herrian.
Halaber, osasun agintariek zehaztu dutenez, atzo zenbatutako positiboetatik 923 Bizkaian atzemandakoak dira; kopuruaren ia erdia da hori. Gainera, Gipuzkoan 464 kasu detektatu dituzte; Nafarroan, 404; eta Araban, berriz, 157.
Ospitaleetan ere nabarmena da kutsatzeen goraldiak izandako eragina. Osakidetzak eta Osasunbideak emandako datuen arabera, oraintxe bertan 413 paziente dira gaitzarekin erietxeraturik Hegoaldean. Horietako 79 ZIU zainketa intentsiboetako unitateetan daude, larri. Erietxeratzeei dagokienez, atzo 57 pertsona sartu zituzten ospitalean birusaren sintomak larriagoturik. Horietako 14 Nafarroan ospitaleratuak dira, eta, gobernuak zehaztu duenez, horietako bi ZIUetara eraman dituzte zuzenean.
Gainera, Nafarroako Gobernuak gaitzarekin loturiko beste bi heriotzaren berri eman du berriki: birusarekin eri ziren bi gizonezko zendu dira herrialdean. 72 eta 84 urte zituzten.
