Europako bankari aberatsek ez zuten krisirik nozitu 2019an. EBA Europako Banku Agentziaren arabera, urte hartan handitu egin zen milioi bat euro baino gehiago irabazi zuten bankarien kopurua. Europan 4.963 izan ziren diru sari hori jaso zutenak; aurreko urtean baino %0,51 gehiago, hain zuzen.
Txostenaren arabera, bankari aberats gehienak Erresuma Batuan bizi dira: 3.519, guztien %71. Hori bai, urte hartan, %2,6 jaitsi zen kopuru hori, hainbatek lekualdatzea erabaki baitzuten. Handik kanpo, Alemania izan zen bankari milioidun gehien hartu zituen herrialdea: 492. Hurrengo, Frantzia eta Italia, 241ekin. EBAren ustez, bi dira antzeko kopuru bat mantendu izanaren arrazoiak. Batetik, hainbat bankuk izandako emaitza onak; eta, bestetik, finantza erakunde handiek eginiko barne berrantolaketa lanak.
Txostenaren ezaugarriak ikusita, ezin da Euskal Herriaren kalkulurik egin. Hego Euskal Herrian egon daitezkeenak, baina, Espainiaren barnean zenbatzen ditu. Espainian, 2019an, 163 bankarik irabazi zuten milioi bat baino gehiago. Horien %60,1ek milioi bat eta bi milioi euroren artean irabazi zuten. 30ek irabazi zuten bi eta hiru milioi euro artean, eta hemezortzik, berriz, hiru eta lau milioi artean. Europan gehien irabazi zuen bankaria Ingalaterran bizi zen, eta 64 milioi euro irabazi zituen urte hartan.
Txostena irakurri nahi izanez gero, hemen (ingelesez).
