Talde armatu batek zibilez betetako konboi bati eraso zion atzo Burkina Faso iparraldean. Erasoa Arbinda eta Gorgadji herrien artean egin zuten, Soum eskualdean, eta gutxienez 30 zibil, indar armatuetako hamalau kide eta gobernuaren aldeko hiru miliziano hil zituzten: 47 lagun guztira.
Uste da Burkina Faso inguruko talde jihadistak daudela erasoaren atzean: Ansarul Islam, Islamaren Babeserako Taldea eta JNIM Musulmanak; guztiak Al-Qaedaren gertukotzat dituzte agintariek. Burkina Fasoko Informazio Agentziaren arabera, 58 pertsona hil eta hemeretzi zauritu zituzten indar armatuen eta erasotzaileen arteko borroketan.
Azken sei urteotan gora egin dute talde jihadistek herrialdean egindako erasoek. Iragan ekainean egin zuten orain arteko sarraskirik larriena: Al-Qaedarekin lotutako taldeek 160 lagunetik gora hil zituzten, Sahel eskualdean. Hain zuzen, eskualdeak muga egiten du Malirekin eta Nigerrekin, eta herrialdeko eremurik zaurgarriena da.
Urte hasieratik, indarkeriak 850 hildako utzi ditu herrialdean, eta bi urtean 1,3 milioi pertsonek beren etxea utzi dute, ACNUR Nazio Batuen Errrefuxiatuentzako Goi Mandatariak uztailean emandako datuen arabera.
