Atzo hitz egin zuen Mohammed VI.a Marokoko erregeak, eta jakinarazi zuen Espainiarekin «konfiantzan, gardentasunean eta errespetuan» oinarritutako harreman bat eraiki nahi duela. «Herriaren eta erregearen iraultzaren urteurrena» omentzeko ekitaldi batean hartu zuen hitza, eta adierazi zuen Espainiako Gobernuarekin lanean jarraitu nahi duela.
Izan ere, Marokoren eta Espainiaren arteko krisi diplomatikoa larria izan da azken hilabeteetan. Espainiak Fronte Polisarioko buru Brahim Ghali Logroñoko (Espainia) erietxe batean onartu zuenean hasi zen gatazka. Horri erantzuteko, Marokok mugetako segurtasun neurriak leundu zituen, eta 10.000 migratzaileri baino gehiagori pasabidea erraztu.
Mohamed VI.aren iritziz, krisi honek elkarrenganako konfiantza «gogor» astindu du, eta bi herrialdeen arteko harremanaren patuari buruzko «galdera ugari» sortu ditu. Alde horretatik, jakinarazi du Marokok Espainiarekin «erabateko lasaitasun, gardentasun eta erantzukizuneko giroan» lan egin duela.
