Inoiz bezalako euri jasa batek izugarrizko uholdeak eragin ditu Ameriketako Estatu Batuetako Tennessee estatuan. Urak txikizio izugarriak eragin zituen larunbatean, eta, erreskate zerbitzuen arabera, jada 22 hildako baieztatu dituzte, eta beste 45 lagun desagertuta daude. Haien bila dabiltza oraindik, eta laguntza eskatu diete herritarrei.
Larunbatean bertan urak errepideak hartu zituen, eta, besteak beste, telefono antenak ere suntsitu zituen; inkomunikatuta geratu zen estatuaren zati bat. AEBetako meteorologia agentziak baieztatu duenez, Tennesseen egun bakarrean inoiz erregistratu den euri jasarik handiena izan zen larunbatekoa.
Joe Biden presidenteak doluminak bidali dizkie «ezusteko uholde horren» biktimei, sare sozialen bidez: «Babesa eskaintzeko prest gaude. Jada hitz egin dut Tennesseeko agintariekin, eta haien eskura jarri ditut AEBtako gobernuaren baliabideak», azaldu du.
I send my deepest condolences for the sudden and tragic loss of life due to flash flooding in Tennessee. We’ve reached out to the community and will offer any assistance they need in this terrible moment.
— President Biden (@POTUS) August 22, 2021
Egun bakarrean izugarrizko suntsiketak eragin dituzte uholdeek; izan ere, iganderako ura bere bidera itzuli zen jada.
AEBen ekialdea, mehatxupean
Tennessee ez da uholdeak jasaten ari den AEBetako estatu bakarra. Henri hurakana herrialdearen ipar ekialdeari erasaten ari zaio, eta 35 milioi pertsona daude alertapean. Abisua lehenago jaso zuten, egunak zeramatzaten zetorrenerako prestatzen, eta hala eragotzi ahal izan dituzte kalte handiagoak.
Atzo heldu zen urakan hori AEBetara ekaitz tropikal forman: zehazki, Rhode Islandera, New Yorketik gertu, eta 100.000 lagun inguru utzi ditu argindarrik gabe. Adituek aurreikusi dute ekaitzak indarra galduko duela herrialdearen barrura egin ahala.
WILD WEATHER: Tropical Storm Henri lashed the northeastern U.S. coastline with heavy rain and high winds, causing flooding and devastation in New Jersey and New York before making landfall near Westerly, Rhode Island. https://t.co/17aV64vU78pic.twitter.com/9W13YoaI1u
— CBS News (@CBSNews) August 22, 2021
