Birusaren transmisioaren beheranzko joera berresten ari da egunetik egunera Hego Euskal Herrian. Kutsatuen kurba maldan behera da azken lau asteotan, aski malkartsu. Orain hilabeteko datuekin alderatuta, leuntzea bistakoa da: atzo 607 kasu positibo zenbatu zituzten Hegoaldean egindako probetan. Uztailaren 24an, berriz, 2.077 detektatu ziren; halako hiru baino gehiago, alegia. Halaber, hamar egun joan dira kutsatuen kurbak azken aldiz milakoa gainditu zuenetik.
Zehazki, Nafarroako Gobernuak eta Eusko Jaurlaritzak emandako informazioaren arabera, Osakidetzak eta Osasunbideak 7.879 diagnostiko proba egin zituzten atzo COVID-19a detektatzeko, eta, beraz, positiboen ehunekoa %7,7 izan zen Hegoaldean. Kutsatuei buruzko datuak lurraldeka aztertuta, Bizkaian zenbatu zen positibo gehien: 260. Gainera, Gipuzkoan 178 izan ziren; Nafarroan, 102, eta Araban, berriz, 60.
Beste 53 ospitaleratze
Kutsatzeak leunduta ere, oraindik ere nabarmena da birusak osasun zentroetan utzitako arrastoa. Nekez ari da ospitaleetako okupazioa arintzen. Azken datuen arabera, atzo beste 53 lagun ospitaleratu zituzten gaitzak jota, eta, horiek aintzat harturik, oraintxe bertan 410 paziente dira erietxeetan sarturik. Horietako 106 ZIU zainketa intentsiboetako unitateetan dira. Aurreko eguneko datuen aldean, kopurua murriztu egin da: zazpi gutxiago daude, zehazki.