Gaztetxeak

Kanporatze agindua jaso arren, Davidenean jarraitzeko asmoa dute Ttattolakoek

Auzitegian errekurtsoa jarri dute, eta elkarretaratzera deitu dute 18:30erako Hazparnen (Lapurdi).

Ttattola Gazte Asanbladako kideak gaurko agerraldian, Hazparnen (Lapurdi). IPAR EUSKAL HERRIKO HITZA
Ipar Euskal Herriko Hitza
2021eko abuztuaren 31
12:42
Entzun

Hazparneko (Lapurdi) Ttattola Gazte Asanbladako kideek ez dute abuztuaren 21ean okupatu zuten Davidenea eraikina uzteko asmorik. Hala jakinarazi dute gaur egin duten prentsaurrekoan. Atzo jaso zuten kanporatze agindua; gaur goizeko 10:30erako eraikina husteko zioen hark. Horren ordez, Ttattolakoek errekurtsoa jarri dute auzitegian, eta bi elkarretaratze deitu dituzte: bat gaurko, 18:30erako, eta bestea irailaren 4rako, larunbaterako.

Hemezortzi urteko ibilbidearen ondoren, 2020ko urtarrilean gaztetxeko kideek iragarri zuten Ttattola gaztetxea itxi egingo zela, «indarrez» bota zituztelako eraikinetik. Duela egun batzuk, ordea, — abuztuaren 21ean, zehazki— gaztetxeko kideek jakinarazi zuten beste eraikin bat okupatu zutela: «Hazparneko gazteok, urte bat eta erdi gaztetxerik gabe pasatu eta gero, etxe bat okupatzea deliberatu dugu». Sareetan zabaldutako mezu baten bidez eman zuten atzo kaleratze aginduaren berri, eta dei egin zuten elkarretaratzeetan babes ematera.

Beste eraikina hartu zutenean Ttattolako kideek BERRIAri azaldu ziotenez, urte eta erdi horretan batzarrak egiten aritu ziren, eta, azkenean, herriko kale nagusiko eraikin batean sartzea erabaki zuten. «Ekintza kulturalak egiteko, herria dinamizatzeko eta jendea elkartzeko gune bat izatea nahi dugu. Hau da, gaztetxe rol bat betetzea», esan zuten. Gaur berretsi dute hori. Okupatu zuten eraikinak hamar urte zeramatzan hutsik: «Pisuak alokatzen dituen enpresa batena da, eta jabeak atzerrian bizi dira. Azken hamar urteotan ez du inork baliatu eraikina».

Iruzkinak
Ez dago iruzkinik

Ordenatu
0/500
Interesgarria izango zaizu
Nabarmenduak
Orain, aldi berria dator. Zure aldia. 2025erako 3.000 babesle berri behar ditugu iragana eta geroa orainaldian kontatzeko.