Bi astean Hego Euskal Herrian koronabirus kasuek izan duten beherakada nabarmena da. Abuztuaren 26an 631 positibo atzeman zituzten Osakidetzan eta Osasunbidean. Atzo, berriz, 241 izan ziren, ia bi heren gutxiago. Astebetean, gainera, bigarren aldiz, 250etik behera jaitsi dira positiboak (astelehenean 240 izan ziren). Hamalau eguneko batez bestekoa, berriz, 354 kasutakoa da.
Hego Euskal Herrian 5.245 test egin zituzten atzo, eta, beraz, %4,6koa izan zen atzo positibo tasa. Bosgarren olatuaren jaitsiera argi ikusten da BERRIAren koronabirus datuen grafikoetan. Edonola, aipatzekoa da Araban, Bizkaian eta Gipuzkoan positiboek atzo behera egin bazuten ere, Nafarroan igo egin zirela. Araban, 26 atzeman zituzten (-2); Bizkaian, 91 (-37); Gipuzkoan, 63 (-14) eta Nafarroan, 55 (+8).
Ospitaleratze datuei dagokienez, atzo aurreko egunean baino hamar pertsona gutxiago ospitaleratu zituzten: 21 izan ziren denera. ZIUtan aurreko eguneko gaixo kopurua mantentzen da: 79.
