Madrilgo EMT udal garraio konpaniak berriro aukeratu du Irizar Ie Bus modeloa, hamabi metro luze dena, Madrilen zerbitzua emateko zero igorpenez. Modelo hori, Irizarrek esan duenez, "guztiz segurua da, irisgarria, autonomia eta eraginkortasuna behar bezala egiaztatuak dituena, eta pertsonalizatzeko aukera handiak eskaintzen dituena".
Madrilen ibiliko diren ibilgailuek Irizar bateriak izango dituzte, halaber, eta bi ate, bidaiarientzako 28 eserleku, gidarientzako besaulki bat eta bi gune aulki gurpildunentzat. Jema Energy etxeko (Irizar taldeko enpresa) ECI-100 kargagailu elkarreragile hornituko ditu Irizar e-mobilityk, 100 kilowatteko karga adimenduneko sistemarekin. "Horiei esker, hiru orduan kargatuko dituzte ibilgailuak Combo 2 kargatze hargunearen bidez". Pantografo baten bidez kargatzeko aukera ere izango da, dena den. Ibilgailuek Irizar taldeko Datik enpresaren telemonitorizazio sistema izango dute, gainera.
"Autobus horiek lagungarriak izango dira Madrilgo hiria sustatzen ari den iraunkortasun helburuak lortzeko", azaldu Ormaiztegiko kooperatibak. "Madrilgo EMT erreferentea da munduan elektromugikortasunari dagokionez, eta harro gaude haren iraunkortasun estrategian laguntzeaz, lehendik daukan flotari hogeita hamar ibilgailu berri gehituz”, adierazi du Imanol Rego Irizar e-mobilityko zuzendari nagusiak.