Birusaren kutsatze maila neurtzen duen aldagaiak uztail bukaeratik dira maldan behera Hego Euskal Herrian, ia etenik gabe, eta, hain zuzen, beheranzko joera hori argiki erakusten du intzidentzia tasa metatuak. Azken hamalau egunetan 100.000 biztanleko zenbat kasu detektatu diren adierazten du aldagai horrek. Atzo, Bizkaian eta Gipuzkoan tasa 100dik gorakoa den oraindik ere; gaur zeharkatu dute langa, eta, beraz, lau herrialdeek dute bi zifrako kopurua, azkenik. Zehazki, tasa 99,9 da Bizkaian; Gipuzkoan, 99,1; Araban 86 kutsatu izan dira 100.000 biztanleko, eta Nafarroan, berriz, 67.
Bestalde, atzo egindako testei buruz argitaratutako informazioak ere agerian uzten du bilakaera onbidean dela. Osakidetzak eta Osasunbideak COVID-19a atzemateko 7.308 proba egin zituzten atzo, eta horien guztien %1,8k eman zuten positibo: 133k, alegia. Lurraldeka, Bizkaian 50 izan ziren; Gipuzkoan, 42; Nafarroan, 23; eta Araban, 16.
Halaber, Nafarroako Gobernuak eta Eusko Jaurlaritzak jakinarazi dute atzo beste 25 lagun erietxeratu zituztela birusarekin eri. Horiek aintzat hartuta, oraintxe bertan 192 dira Hegoaldeko zentroetan sartuta. Zehazki, 59 ZIU zainketa intentsiboetako unitateetan daude; azken bi hilabeteetan erregistratutako kopururik apalena da.
Koronabirusa Euskal Herrian duen bilakaeraren datu guztiak eta mapa interaktiboak ikusteko, jo webgune honetara.
