Bizkaiko Diputazioak jakitera eman duenez, agerraldi bat atzeman dute Portugaleteko (Bizkaia) Rodriguez Andoni V adinekoen egoitzan: 50 egoiliar eta 11 langilek positibo eman dute. Positibo eman duten egoiliar guztiek COVID-19aren aurkako txertoaren hirugarren dosia hartua zuten irailaren amaieratik, eta langileek txertoaren pauta osoa jasoa zuten. Kutsatutako guztiak sintomarik gabe daude. Bakar bat ere ez dute ospitaleratu, baina isolatu egin dituzte denak, eta debekatu egin dituzte kanpoko bisitak, badaezpadako neurri gisa.
Nafarroan, 33 positibo
Nafarroako Gobernuak emandako datuen arabera, atzo 1.570 diagnostiko proba egin zituzten COVID-19a atzemateko, eta horietatik 33k eman zuten positibo. Positibo tasa %2,1 da, beraz. Horrez gain, Osasunbideak jakinarazi du atzo ez zutela gaixorik ospitaleratu. Une honetan, 21 gaixo daude gaitzarekin Nafarroako ospitaleetan ingresaturik, horietako lau ZIU zainketa intentsiboetako unitateetan.
Eusko Jaurlaritzaren Osasun Sailak datorren astelehenean eguneratuko ditu datuak.