Gaur goizean ekin diote poliziek okupatua zen Santurtziko (Bizkaia) etxebizitza husteko operazioari. Eusko Jaurlaritzako Segurtasun Sailak emandako datuen arabera, epaileen agindua zuten horretarako, eta 8:15ean hasi dira zeregin horretan. Hustea eragozte aldera, hainbat laguneko talde bat bertaratu da etxebizitza ondora, eta, beraz, Ertzaintzako unitate mugikor bat lotu zaio operazioari.
Handik ordu batzuetara, Polizia etxebizitzaren barrenera sartu da. Ertzaintzaren arabera, han ziren bi lagunek uko egin diote eraikina uzteari. Desobedientzia «larria» leporatuta eraman dituzte atxilo.