Iberdrolak bere diru sarrerak handitu egin ditu urteko lehen bederatzi hilabeteetan, batez ere AEBetako eta Brasilgo merkatuetan erdietsitako emaitza onei esker. Hala ere, iaz baino %10,2 gutxiago irabazi du: 2.408 milioi euro; besteak beste, ez duelako iaz adinako ezohiko sarrerarik izan, iazko zerga batzuk aurten ordaindu dituelako, eta Espainiako Gobernuaren iraileko dekretuak 114 milioi euroko jan dizkielako kontuei.
Gobernuaren dekretuaren eragina, iaz Siemens Gamesaren %8a saltzean lortutako gainbalioak (485 milioi), eta Erresuma Batuan geroratuko zergak urte arteko alderaketatik kenduta, Iberdrolak 2.688 milioi euroko mozkin garbi doitua erdietsi du urteko lehen bederatzi hilabetetan, eta iazko emaitza %5,2 handitu.
Iberdrolak adierazi du ez diela probetxurik atera energiaren prezio garestiei. Gas garestiaren ondorioz garestitutako pooleko argindarraren kostua, konpainiaren arabera, ez da iritsi kontratu finkoa duten beren bezeroetara, haietan argindarraren prezio finkoa dagoelako ezarrita. Prezio hori ordaintzen eta ez pool-ekoa, Iberdrolaren kontuen arabera, bezero horiek 2.000 milioi euroko aurrezkia izan dute orotara.
Inbertsioak %6 handitu dituela ere jakinarazi du konpainiak. 7.036 miloi euroko inbertsioa egin du urtarriletik irailera, eta diru horren %77 Espainiatik kanpoko merkatuetan inbertitu du. Inbertsio guztiaren %90 berriztagarrien proiektuetara, energia biltegiratzera eta argindar sare adimentsuetara joan da.