Atzo, manifestaziora deitu zuen Euskal Eskola Publikoaz Harro topaguneak, salatzeko egungo hezkuntza sistema «duala, klasista eta arrazista» dela eta «bi mailako» ikasleak sortzen dituela. Azaroaren 6an eginen dute protesta, Bilbon. Deialdi horrekin bat egin du ELA sindikatuak gaur, eskola publikoak gaur egun dituen gabeziak salatzeko xedez. Eskola publikoa finantzatzea «lehentasuntzat hartzeko» galdeginen diote Eusko Jaurlaritzari.
ELAren aburuz, ezinbestekoa da Jaurlaritza «interpelazioaren jomugan» jartzea, erakunde hori baita «hezkuntza publikoaren baliabideak eta neurriak ezar ditzakeena».
Besteak beste, honako neurri hauek aldarrikatuko dituzte azaroaren 6ko manifestazioan: 0 eta 18 urte bitarteko hezkuntzaren doakotasuna bermatzea, eskola publikoak eskaintza berma dezakeen tokietan ez daitezela eskola pribatu gehiago eraiki, ikastetxe itunduen publifikazioa aztertzea, eta D eredua orokortzea.
Horrez gain, manifestazioa baliatuko dute kritikatzeko ikasleen segregazioa, hezkuntza publikoko langileen lan baldintzak, behar bereziko ikasleen baliabiderik eza eta LOMCE eta LOMLOE legeen ezarpena.